Скопје наскоро ќе добие три современи јавни тоалети, како дел од најавениот градски проект за подобрување на урбаната инфраструктура и хигиената во јавниот простор. Градоначалникот на Скопје, Орце Ѓорѓиевски, во изјава преку социјалните мрежи потврди дека подготовките за проектот се во тек, откако граѓаните со години реагираат на недостигот од јавни санитарни објекти во централните делови на градот.

Според најавите, новите јавни тоалети ќе бидат поставени на три клучни локации: во Градскиот парк во Скопје, на плоштадот „Филип Втори Македонски“ и во близина на главниот градски плоштад во Скопје.

Недостигот на јавни тоалети одамна е проблем кој го истакнуваат и жителите и туристичките водичи, кои посочуваат дека посетителите честопати се принудени да користат угостителски објекти поради немање алтернативни решенија.

„Извинете, но јавните тоалети навистина недостасуваат. Туристите немаат каде да одат. Потребно е системско решение кое ќе ја подобри сликата за градот“, реагираат дел од граѓаните.

Проектот се смета за дел од пошироките напори за подобрување на туристичката понуда и урбаната функционалност на Скопје, особено во летните месеци кога градот бележи зголемен број посетители.