Американското Министерство за правда одби да предаде дополнителни документи од истрагата за случајот поврзан со Џефри Епстин и покрај претходна судска наредба со која се бара нивно објавување.

Според поднесокот до судот, владините адвокати тврдат дека дел од материјалите содржат чувствителни информации за жртвите или се веќе редигирани во согласност со законските прописи. Министерството побарало и продолжување на рокот за дополнителни 60 дена или целосно укинување на обврската за предавање на документите. Во образложението се наведува дека одредени електронски пораки се уредувани со цел да се заштити идентитетот на жртвите, а дел од содржината може да биде „вознемирувачка ако се извади од контекст“.

Случајот дополнително се комплицира околу материјали од 2007 година, за кои Министерството тврди дека не успеало да ја пронајде нередигираната верзија. Посебен дел од спорот се однесува и на рачно пишувани белешки од интервјуа со лице кое изнело тврдења против поранешен американски претседател Доналд Трамп, кои, според обвинителството, не се објавуваат поради ризик од откривање на идентитети и технички ограничувања.

Судот претходно оцени дека постојат индиции за непочитување на законските обврски за транспарентност, додека Министерството инсистира дека постапува во рамки на законот. Критиките во јавноста и меѓу дел од политичарите растат, со прашања дали се забавува или селективно се спроведува објавувањето на материјалите поврзани со еден од најконтроверзните случаи во САД.