Јаник Синер одигра маестрален меч и го совлада Новак Ѓоковиќ со убедливи 6:4, 6:4, 6:4, со што се пласираше во своето второ финале на Вимблдон во кариерата. Најдобриот тенисер на АТП-листата целосно го контролираше полуфиналето против најтрофејниот играч во историјата на гренд слем турнирите и стигна до седмата победа во нивниот 12-ти меѓусебен дуел.

Синер во финалето ќе се бори за својот петти гренд слем трофеј, а втор на Вимблдон. Негов противник ќе биде Александер Зверев, кој претходно го совлада Британецот Артур Фери со 3:0 во сетови. Италијанецот има позитивен биланс против Зверев, води со 10:4 во меѓусебните дуели. Двајцата веќе играа едно гренд слем финале, кога Синер славеше против Германецот со 3:0 во финалето на Австралија опен 2025.

Синер доминираше од почеток до крај

Од самиот старт беше јасно дека Синер е во одлична форма. Двајцата тенисери сигурно го чуваа својот сервис, но клучниот момент во првиот сет дојде во деветтиот гем. Италијанецот го искористи послабиот излез на Ѓоковиќ на мрежа и со прецизен бекхенд му го одзеде сервисот за водство од 5:4. Потоа без проблем го потврди брејкот и го освои сетот со 6:4.

Статистиката ја потврди неговата надмоќ, Синер имаше 14 винери наспроти 7 на Ѓоковиќ и помалку неизнудени грешки.

Ѓоковиќ се бореше, но немаше одговор

Во вториот сет Србинот ја подигна играта и спаси две брејк-топки во петтиот гем, но повторно попушти под притисокот.

Во седмиот гем Синер го искористи падот во концентрацијата на противникот, како и двојната сервис-грешка на Ѓоковиќ, за нов брејк и водство од 4:3. До крајот на сетот Италијанецот сигурно ја задржа предноста и повторно славеше со 6:4.

Особено импресивен беше податокот дека Ѓоковиќ во првите два сета не доби ниту една брејк-топка.

Импресивни бројки на најдобриот тенисер во светот

Третиот сет започна со нов удар на Синер. Тој веднаш направи брејк и ја презеде целосната контрола врз мечот.

Ѓоковиќ конечно стигна до својата прва и единствена брејк-топка во четвртиот гем, но Синер ја спаси со ас-сервис. Италијанецот на крајот го заврши мечот во голем стил – со сервис гем без изгубен поен. Синер мечот го заврши со неверојатни: 40 винери, само 15 неизнудени грешки,16 асови и освоени 88% од поените на прв сервис. Ѓоковиќ имаше 26 винери и 23 неизнудени грешки.

Со оваа победа Синер ќе го брани трофејот на Вимблдон во финалето против Зверев, кој годинава пристигнува како актуелен шампион на Ролан Гарос.