70.827 денари за еден месец живот: колку им останува на семејствата од платите?

Минималните трошоци за четиричлено семејство повторно пораснаа, а Владата повторно размислува за ограничување на маржите. Споредбата со платите покажува колку е тесен буџетот за огромен дел од работниците

Синдикалната минимална кошничка за ноември изнесува 70.827 денари, за 469 денари повеќе од октомври, соопшти Сојузот на синдикатите на Македонија. Ако семејството живее под кирија во стан од 60 квадратни метри, сметката се зголемува на 86.202 денари. Пресметката е направена за четиричлено семејство, двајца возрасни и две деца.

Најголемиот дел од трошоците одат за храна и пијалаци, 25.902 денари или 36,6 отсто од кошничката. За облека и обувки се потребни 6.684 денари, за сметките 6.379, а за транспорт 5.105. На хигиена отпаѓаат 2.704 денари, а на здравје 1.201 денар. Според Државниот завод за статистика, просечната нето-плата во септември изнесувала 49.141 денар, за 8,1 отсто повеќе од лани, а реалниот раст е 5,2 отсто. Една просечна плата покрива околу 69 отсто од минималната кошничка. Со две просечни плати, вкупно 98.282 денари, семејството може да ги покрие и трошоците за кирија, при што му остануваат околу 12.000 денари.

Разликите меѓу секторите се големи. Просечната плата во ИТ-секторот е 88.787 денари и сама ја покрива дури и кошничката со кирија. Тоа е два и пол пати повеќе од платите во секторот сместување и угостителство, каде што просекот е 35.447 денари.

Податоците за платите се за септември, а кошничката е за ноември, па споредбата е приближна. Министерството за економија и труд пресметува посебна просечна потрошувачка кошничка, која во октомври изнесувала 59.149 денари, за 1,6 отсто повеќе од претходниот месец. Сепак, методологијата е различна и двете бројки не се споредуваат директно. Годишната инфлација во октомври била 3,3 отсто.

Владата повторно ја разгледува можноста за ограничување на маржите на основните прехранбени производи, но одлука нема. Министерот за економија и труд, Бесар Дурмиши, рекол дека мерката ќе дојде на седница на Владата само ако секторот достави конкретен предлог. Сè уште не е јасно кои производи би биле опфатени, колкава би била маржата и колку би траела мерката. Во февруари 2025 година маржите беа ограничени за 102 групи производи, а сега се подготвуваат и измени на Законот за нефер трговски практики, со кои казните би пораснале од 20.000 на 200.000 евра.


Најостро се гледа сметката кај угостителските работници. Вработен со просечна плата во угостителството издвојува 73 отсто од платата само за храната што кошничката ја предвидува за неговото семејство. Ако двајцата родители работат во угостителството, заедно заработуваат 70.894 денари, што ја покрива кошничката со само 67 денари вишок. Ако живеат под кирија, им недостасуваат над 15.000 денари секој месец.

е-Трн да боцка во твојот инбокс