Кинескиот претседател Си Џинпинг и рускиот претседател Владимир Путин во Пекинг започнаа нова рунда разговори и потпишување договори со кои двете земји сакаат дополнително да го зацврстат своето стратешко партнерство. Средбата доаѓа само неколку дена по посетата на американскиот претседател Доналд Трамп на Кина, што ѝ дава дополнителна дипломатска тежина на пораката од Пекинг.
Двајцата лидери потпишаа заедничка изјава за зајакнување на стратешката координација и продлабочување на добрососедската и пријателската соработка. Според Кремљ, за време на посетата се очекува да бидат потпишани околу 40 документи, како и заедничка изјава од 47 страници за натамошно зајакнување на партнерството меѓу Москва и Пекинг.
Путин изјави дека односите меѓу Русија и Кина се на „невидено ниво“ и го покани Си да ја посети Русија следната година. Тој нагласи дека економската соработка меѓу двете земји продолжува и покрај „неповолните надворешни фактори“, а Москва се обидува дополнително да ги засили енергетските врски со Пекинг.
Си, пак, порача дека Кина и Русија треба да размислуваат долгорочно и да промовираат, како што рече, поправеден и поразумен систем на глобално управување. Во неговата порака повторно се читаше заедничкиот став на Пекинг и Москва против западната доминација и за поголема улога на незападните сили во меѓународниот поредок.
Договорите што се очекува да бидат потпишани опфаќаат трговија, економија, технологија и енергетска соработка. Една од можните теми е и гасоводот „Сила на Сибир 2“, преку кој Русија сака да го зголеми извозот на гас кон Кина, особено по загубата на дел од европскиот пазар поради војната во Украина и западните санкции.
Трговската размена меѓу Кина и Русија во 2025 година изнесувала околу 240 милијарди долари, што е пад од 6,5 проценти во однос на рекордната 2024 година и прв пад по пет години раст. Сепак, според Reuters, во првите четири месеци од 2026 година бил забележан нов раст на билатералната трговија, што двете страни го претставуваат како сигнал дека економската врска повторно се стабилизира.
