Шкотската фудбалска репрезентација успешно го започна настапот на Светското првенство 2026, откако во првиот натпревар од групата Ц го совлада Хаити со минимални 1:0. Единствениот гол на натпреварот, одигран на стадионот „Жилет“ во Бостон, го постигна Џон Мекгин во 28. минута.

Со освоените три бода, Шкотска се искачи на првото место во групата, пред Бразил и Мароко, кои во својот меѓусебен дуел ремизираа 1:1.

Натпреварот беше проследен од повеќе од 64.000 гледачи, а улиците на Бостон уште пред почетокот беа преплавени со шкотски навивачи. Познатата „Тартан армија“ повторно покажа зошто важи за една од најверните и најатрактивни навивачки групи во светот.

Шкотска настапи без повредениот дефанзивец Скот Мекена, кој има проблеми со листот на ногата. Од друга страна, Хаити се соочи со необичен проблем пред стартот на турнирот, откако ФИФА не дозволи користење на подготвената гарнитура дресови поради детали што можеле да се протолкуваат како политичка порака. За Шкотска ова е особено значајна победа, бидејќи претставува нивен прв триумф на Светските првенства по цели 36 години, што дополнително ја зголемува еуфоријата кај навивачите и надежите за успешен настап на турнирот во САД, Канада и Мексико.

Во следното коло Шкотска ќе се обиде да го потврди добриот старт и да направи уште еден чекор кон пласман во нокаут-фазата на Светското првенство.