Светското првенство 2026 донесе уште едно големо изненадување. Репрезентацијата на Јужна Африка ја совлада Јужна Кореја со 1:0 во последното коло од групата А и обезбеди пласман во осминафиналето. Во вториот натпревар од групата, Мексико убедливо ја победи Чешка со 3:0 и го потврди првото место на табелата. Со овој расплет, познат е и првиот осминафинален пар на турнирот, Мексико ќе се соочи со Јужна Африка во борбата за четвртфинале.

Јужнокорејците влегоа како фаворити во натпреварот, но не успеаја да ја оправдаат таа улога. Иако создадоа неколку добри шанси, особено во првото полувреме, не најдоа начин да ја затресат противничката мрежа. Клучниот момент се случи во 63. минута кога по брза контраакција Мореми асистираше до Тапело Масеко, кој прецизно погоди за голема радост на јужноафриканските навивачи. До крајот на мечот Корејците не успеаја да создадат сериозен притисок, а Јужна Африка рутински ја сочува предноста.

Во паралелниот натпревар Мексико ја демонстрираше својата сила против Чешка. Луис Чавез го отвори резултатот во 54. минута, Хулијан Кињонес зголеми на 2:0 само шест минути подоцна, а Алваро Фидалго ги постави конечните 3:0 во судиското продолжение.

Натпреварот го одбележа и легендарниот голман Гиљермо Очоа, кој настапи на уште едно Светско првенство и дополнително го збогати своето импресивно фудбалско наследство. Со овие резултати Мексико заврши како лидер во групата А, Јужна Африка го освои второто место и обезбеди историски пласман во нокаут-фазата, додека Јужна Кореја ќе чека разврска во останатите групи во надеж дека ќе се најде меѓу најдобрите третопласирани селекции.