Селин Дион официјално им се врати на настапите во живо со концертна резиденција во салата „Пленитуд арена“ во Париз, означувајќи го крајот на повеќегодишната пауза поради сериозни здравствени проблеми. Пејачката започна серија од вкупно 26 концерти на кои ги изведува своите најголеми хитови на француски и на англиски јазик, а нејзиниот камбек на сцената предизвика реакции и честитки од колегите од светската музичка индустрија.

Канадската пејачка, која има 58 години, по долга борба со болеста повторно застана пред публиката во главниот град на Франција. Концертниот циклус во париската „Пленитуд арена“ опфаќа 26 концерти и според планот ќе трае сè до мај 2027 година. Публиката во Париз ги слушна нејзините најпознати нумери на француски и англиски јазик, со што Дион го потврди враќањето на големата сцена по долгото отсуство.

Честитка за успешното враќање на сцената упати Пол Макартни, кој преку социјалните мрежи изрази воодушевување од приемот на кој наиде канадската ѕвезда.

„Прекрасно е да се видат неверојатните реакции на враќањето на Селин во Париз. Има толку многу љубов кон неа“, напиша 84-годишниот член на „Битлси“.

Макартни откри дека Дион позајмила глас за еден од ликовите во претстојниот анимиран мјузикл „High in the Clouds“, проект базиран на истоимениот роман чиј коавтор и продуцент е токму тој.

„Многу сум возбуден што таа е дел од нашиот филм ‘High in the Clouds’. Штотуку ги слушав некои од нејзините делници и воодушевен сум. Каков талент. Имаме голема среќа што е во тимот. Едвај чекам да го покажеме пред светот“, додаде Макартни.

Анимираниот филм „High in the Clouds“ ќе има француска премиера во јули 2027 година. Покрај Селин Дион, гласовната постава во ова остварување ја сочинуваат актерите Химеш Пател, Хана Вадингам и музичарот Лајонел Ричи.