Во зимските месеци, кога почесто престојуваме во затворени простории, се зголемува и ризикот од ширење на респираторни инфекции. Но, поддршката на имунолошкиот систем не се сведува само на земање витамини и суплементи. Секојдневните навики, од квалитетот на спиењето до физичката активност и воздухот во просториите, имаат важна улога во неговото правилно функционирање.
Имунолошкиот систем е природната одбрана на организмот од болести. Тој нè штити од инфекции, помага во отстранувањето на оштетените клетки и учествува во закрепнувањето по болест или повреда.
„Иако не можеме да ја избегнеме секоја настинка или грип во текот на зимата, грижата за имунитетот е исклучително важен дел од целокупното здравје“, вели д-р Лук Пулс. Според лекарите, целта не е имунолошкиот систем постојано да се стимулира, туку да се одржува во рамнотежа и да му се овозможат услови за нормално функционирање. За „Индипендент“ тие издвојуваат шест навики што можат да помогнат во текот на студените месеци.
Обезбедете си доволно квалитетен сон
Сонот е еден од најважните фактори за одржување на здрав имунолошки систем. Додека спиеме, организмот се обновува и ги активира процесите што му помагаат да се справи со инфекции и воспаленија. Недостигот од сон може да ја намали способноста на телото ефикасно да реагира на вируси и бактерии, предупредува д-р Пулс.
Д-р Анураг Барадвај од болницата „Нафилд Брентвуд“ препорачува седум до девет часа сон во текот на ноќта, особено во зимскиот период. Тој посочува дека забрзаното секојдневие, анксиозноста, заморот и бројните обврски често го нарушуваат ритамот на спиење.
За подобар сон, советува да се избегнуваат цигари, кафе и користење паметни уреди доцна навечер.
Јадете разновидна и урамнотежена храна
На имунолошкиот систем му се потребни различни хранливи материи за да функционира правилно. Исхраната богата со овошје, зеленчук, интегрални житарки, посни протеини и здрави масти обезбедува важни витамини и минерали, меѓу кои витамините А, Ц и Д и цинкот. Разновидната исхрана има улога и во одржувањето на цревниот микробиом, кој сè повеќе се препознава како важен дел од одбранбениот систем на организмот.
Затоа, наместо да се потпирате на еден вид храна или на одреден витамин, важно е во секојдневното мени да има различни намирници што обезбедуваат широк спектар хранливи материи.
Надоместете ги недостатоците на витамини и минерали
Суплементите можат да бидат корисни кога во организмот има утврден недостиг од одредени хранливи материи. Д-р Барадвај ги издвојува витаминот Д, витаминот Б12 и железото како примери за недостатоци што треба да се надоместат. Но, земањето дополнителни количества витамини и минерали не значи автоматски и посилен имунитет.
„Со суплементите треба да се надомести само она што недостига“, објаснува лекарот.
Недостигот од одредени витамини и минерали може да биде проследен со симптоми како анемија и замор. Ако чувствувате постојан замор, имате бледило или недостиг на воздух, препораката е да се консултирате со лекар. Соодветните крвни анализи можат да помогнат да се утврди причината за симптомите.
Движете се редовно
Умерената физичка активност може да придонесе за правилно функционирање на имунолошкиот систем и да го намали ризикот од инфекции. Д-р Барадвај препорачува побрзо одење или друга аеробна активност во поголемиот дел од деновите во неделата, како и вежби за сила два до три пати неделно.
Клучот е во редовноста, а не во интензитетот. Претераното вежбање не е неопходно, особено ако по неколку дена интензивен тренинг следува долг период без никаква физичка активност. Според д-р Пулс, движењето ја подобрува циркулацијата и им овозможува на имунолошките клетки поефикасно да се движат низ организмот. Физичката активност има и други придобивки: го поддржува кардиоваскуларното здравје, го подобрува расположението и може да придонесе за намалување на воспалителните процеси.
Научете да управувате со стресот
Повремениот стрес е нормален дел од животот, но кога трае подолго време може негативно да влијае врз имунолошкиот систем. Д-р Пулс предупредува дека продолженото изложување на стрес може да ја намали способноста на организмот да се справува со инфекции.
Пронаоѓањето здрави начини за справување со секојдневниот притисок може да помогне. Меѓу нив се физичката активност и престојот на отворено, но и други активности што придонесуваат за одмор и психолошка рамнотежа.
Проветрувајте ги просториите секој ден
Во студените денови често ги држиме прозорците затворени подолго време, а тоа ја намалува циркулацијата на воздухот во просториите. Ова може да биде особено проблематично кога во домот или работниот простор престојува лице со респираторна инфекција. Д-р Барадвај советува секојдневно проветрување, одржување чист воздух во затворените простории и дополнителна претпазливост кога некој е болен.
Во такви ситуации, изолацијата на заболеното лице и користењето маска можат да помогнат во намалувањето на ризикот од пренесување на инфекцијата.
„Квалитетниот воздух во затворените простории е многу поважен од престојот во преполни и задушливи простории“, заклучува лекарот.
Зимата носи поголема изложеност на респираторни инфекции, но грижата за имунитетот не треба да се сведе на повремено земање витамини. Редовниот сон, разновидната исхрана, движењето, контролата на стресот и проветрувањето се едноставни навики што можат да придонесат за подобро општо здравје.
