Осум лица, меѓу кои и три деца, се спасени откако рано утрово делумно се урна седумкатна станбена зграда во истанбулската населба Малтепе. Се стравува дека уште четири лица останале заробени под урнатините, додека спасувачките екипи продолжуваат со пребарувањето на објектот.
Зградата се наоѓа на улицата Догу, во населбата Џевизли, а според првичните информации се урнале првите три ката. Причината за уривањето засега не е позната. Надлежните служби добиле дојава околу 5:40 часот по локално време, по што на местото веднаш биле испратени екипи на итната помош, пожарникари и спасувачки тимови.
Спасувачите најпрво ги евакуирале станарите кои останале заробени на повисоките катови, кои не биле урнати. Потоа започнала потрагата по лица под урнатините, при што биле ангажирани и кучиња трагачи. Од урнатините досега биле извлечени осум лица, а меѓу нив има и деца. Спасените се предадени на медицинските екипи и биле пренесени во блиските болници.
Во приземјето на зградата имало текстилна работилница, но според информациите објавени од „Туркије тудеј“, во моментот на уривањето таа била празна. Поради опасноста од дополнително уривање на преостанатиот дел од објектот, спасувачите работат со зголемена претпазливост.
Пристапот до местото на несреќата е ограничен, а улиците во околината се затворени за сообраќај. Околу зградата е поставена поширока безбедносна зона за да може спасувачката операција да се одвива без дополнителен ризик, а во акцијата е вклучена и тешка механизација испратена од околните општини.
Гувернерот на Истанбул, Давут Ѓул, изјави дека ниту едно од осумте спасени лица не е во животна опасност. Тој предупреди дека бројот на лица за кои се претпоставува дека се под урнатините може да се промени, во зависност од тоа дали во зградата во моментот на уривањето имало посетители и дали некои од станарите претходно го напуштиле објектот.
Ѓул најави дека надлежните ќе проверуваат и дали при изградбата и издавањето градежни и други дозволи имало неправилности, како од административен, така и од правен аспект. Во меѓувреме, од безбедносни причини се евакуирани и дел од околните згради за кои било проценето дека би можеле да бидат загрозени.
Истрагата треба да утврди што го предизвикало уривањето на седумкатницата. Додека надлежните го обезбедуваат теренот и ги проверуваат околните објекти, спасувачките екипи продолжуваат со потрагата по евентуално преживеани под урнатините.
