Околу 30 до 40 лица останале заробени откако во неделата се урна деветкатна зграда во изградба во филипинскиот град Анџелес, соопшти локален градски функционер. Според првичните информации, осум лица кои се наоѓале во близина на објектот се спасени, додека уште 11 успеале да побегнат, меѓу кои и раководителот на градилиштето.

Градскиот портпарол Џеј Пелајо изјави дека, според проценките на раководителот на градилиштето, меѓу 30 и 40 лица се водат како исчезнати. Спасувачките екипи се на терен и продолжуваат со потрага и извлекување на преживеани, но операцијата е отежната поради количината на бетон и урнат материјал.

Причината сè уште непозната

Причината за уривањето засега не е утврдена. Локалните власти соопштија дека градски инженер ја проверува документацијата и историјата на изградбата на објектот. Според надлежните, сè уште е рано да се даде официјална оценка за причините, бидејќи истрагата е во тек.

При уривањето биле оштетени и електрични водови во околината, што дополнително ја комплицира ситуацијата на терен. Властите апелираат жителите да соработуваат со спасувачките служби за да не се попречи акцијата и за да се избегнат дополнителни ризици. Спасувачката операција продолжува, додека бројот на загинати и повредени сè уште не е официјално потврден.