Вашингтон воведе санкции против кинеска рафинерија и мрежа бродови поврзани со иранската нафта, непосредно пред новата рунда разговори со Техеран.
САД влегуваат во новата рунда разговори со Иран со двојна стратегија: дипломатски контакти од една страна и нов економски притисок од друга. Администрацијата на американскиот претседател Доналд Трамп воведе санкции против кинеска рафинерија што купувала иранска нафта, како и против мрежа бродски компании и пловила поврзани со извозот на иранска суровина.
Потегот доаѓа непосредно пред новите разговори меѓу американски и ирански претставници и испраќа порака дека Вашингтон не планира да го намали притисокот врз Техеран додека траат дипломатските обиди.
Американското Министерство за финансии воведе санкции против „Хенгли петрокемикал“ од Далиан, означувајќи ја компанијата како еден од најголемите купувачи на иранска сурова нафта и деривати. На црната листа се најдоа и околу 40 бродски компании и пловила за кои Вашингтон тврди дека се дел од мрежата преку која Иран продолжува да ја пласира својата нафта на глобалниот пазар.
Министерот за финансии Скот Бесент изјави дека мерките се дел од „финансиски стегач“ насочен кон ограничување на приходите со кои, според Вашингтон, Техеран ги финансира воените активности и нуклеарните амбиции.
Но новите санкции не се насочени само кон Иран. Тие отвораат и чувствителен спор со Кина, која, според податоците на „Кплер“, купува повеќе од 80 проценти од иранската испорачана нафта. Независните кинески рафинерии, познати како „чајници“, со години се еден од главните канали преку кои иранската нафта стигнува до пазарот и покрај западните ограничувања.
Вашингтон и претходно санкционираше дел од овие рафинерии, но аналитичарите оценуваат дека ефектот бил ограничен, бидејќи тие имаат мала изложеност на американскиот финансиски систем. Затоа вниманието сè повеќе се насочува кон кинеските банки што би можеле да ги олеснуваат плаќањата.
Бесент неодамна соопшти дека Министерството за финансии испратило предупредувања до две кинески банки за можни секундарни санкции, доколку се утврди дека преку нивни сметки се движат ирански средства.
Пекинг ја отфрла ваквата политика и се спротивставува на еднострани санкции. Од кинеската амбасада во Вашингтон порачаа дека САД ги политизираат трговските односи и дека нормалната трговија не треба да биде погодена.
Во позадина на овој судир стои и енергетска пресметка. Кинеските независни рафинерии, кои сочинуваат околу една четвртина од рафинерискиот капацитет на земјата, веќе се соочуваат со слаба домашна побарувачка и тесни маржи. Дополнителен притисок е тоа што, според извештаите, тие неодамна биле принудени да купуваат иранска нафта по повисоки цени во однос на „брент“.
Санкциите доаѓаат во момент кога тензиите околу Ормускиот Теснец остануваат високи, а секое нарушување на испораките може да има пошироки последици врз глобалниот пазар на енергенси.
Клучното прашање сега е дали новите американски мерки навистина ќе го ограничат извозот на иранска нафта или ќе останат уште еден геополитички сигнал пред преговорите со Техеран.
