Новиот круг преговори меѓу САД и Иран, кој треба да се одржи утре во Исламабад, доаѓа во момент кога ситуацијата на терен дополнително се влошува. Американската морнарица во изминатите денови пресретна и заплени ирански брод во близина на Ормускиот теснец, што Техеран го оцени како кршење на примирјето и сигнализираше можност за повлекување од разговорите.
Паралелно со дипломатските подготовки, САД ја задржуваат поморската блокада кон Иран, воведена по пропаѓањето на претходните разговори. Специјалните сили вратија 27 бродови кои се обидувале да влезат во иранските пристаништа. Блокадата се однесува на бродови што влегуваат и излегуваат од ирански пристаништа, а американските сили најавија дека ќе продолжат со пресретнување и запирање на сомнителни пловила.
Во пресрет на разговорите, клучна тема се очекува да биде управувањето со кризата околу Ормус и ограничувањето на иранските нуклеарни активности. Според дипломатски извори, фокусот на разговорите се поместува кон практични прашања како безбедноста на транспортот и стабилизацијата на енергетските пазари, додека пошироките теми (како регионалното влијание на Иран и ракетната програма) може да останат во втор план.
Додека Вашингтон и натаму се заканува со можни удари врз иранската инфраструктура, од Техеран доаѓаат пораки дека преговори под притисок нема да бидат прифатени. Иранските власти веќе сигнализираа дека учеството во новиот круг разговори не е сигурно, додека од американска страна пораката останува иста: блокадата ќе биде задржана сè додека не се постигне договор.
