Федералната управа за авијација (ФАА) ги приземји сите летови низ Соединетите Американски Држави во петокот попладне по локално време, откако се појавија проблеми во комуникацијата во регионалните центри за контрола на летање. Одлуката за целосен прекин на летовите во САД е донесена од безбедносни причини, а техничките тимови на управата работат на утврдување на причините за дефектот.

Во официјалното известување на Федералната управа за авијација (ФАА) се наведува дека приземјувањето на авионите е воведено „поради вонредни околности и од безбедносни причини“. Ваков чекор во авијацијата значи дека ниту еден авион не смее да полета кон својата дестинација додека не се стабилизира системот за управување со воздушниот простор.

Американскиот секретар за транспорт, Шон Дафи, потврди дека станува збор за комуникациски проблем што ги погодува регионалните центри за контрола на летање. Овие центри се одговорни за насочување на авионите на големи височини додека тие патуваат меѓу аеродромите низ целата земја. Техничарите на ФАА веднаш започнаа истрага за отстранување на пречките во системот.

Целосното приземјување на сите летови на национално ниво е ретка мерка во американскиот воздушен сообраќај. Ова е прв ваков прекин од јануари 2023 година, кога се случи дефект на еден од главните компјутерски системи на Федералната управа за авијација за известување на пилотите.

Пред инцидентот во 2023 година, единствениот претходен случај на целосно запирање на сите комерцијални летови во Соединетите Американски Држави се случи по терористичките напади на 11 септември 2001 година.