Русија треба да одговори со директно воено одвраќање на новите американски санкции, објави поранешниот руски претседател Дмитриј Медведев на Телеграм. Оваа реакција доаѓа еден ден откако американскиот претседател Доналд Трамп стави потпис на нов, обемен пакет економски мерки против Москва. Заменикот на Советот за безбедност на Русија тврди дека администрацијата преку океанот разбира само притисок преку воена сила.
Медведев отворено повика на вооружено одвраќање кон Вашингтон, коментирајќи го новиот пакет мерки што американскиот Конгрес го изгласа под името на сенаторот Линдзи Греам.
„Преку океанот исто така слушаат само јазик на директно воено одвраќање и токму со тој јазик треба да одговараме на русофобните гадости како Греамовиот закон“, напиша рускиот функционер на својот официјален канал.
Тој не прецизираше какви конкретни воени чекори или операции планира руската армија. Ваквите директни закани за воен одговор кон Вашингтон претставуваат натамошно заострување на реториката на Кремљ по секој нов бран економски притисок.
Поводот за нервозата во Москва е законот што Трамп го потпиша вчера, со кој значително се прошируваат трговските и финансиските блокади против Русија поради војната во Украина. Со овој закон истовремено се продолжуваат и постојните санкции кон Иран.
Белата куќа потврди дека новите мерки директно таргетираат руски државни функционери, банкарски институции, како и одбранбениот и енергетскиот сектор. Посебен фокус е ставен на таканаречената руска „флота во сенка“, односно танкерите преку кои Москва со месеци ги заобиколуваше западните ограничувања за извоз на нафта и гас.
Законот му дава овластување на американскиот претседател да воведе царини до 100 проценти за најголемите странски купувачи на руски енергенти, со што притисокот се прелева и врз земјите што досега тргуваа со Москва.
Мерките поминаа по неколкумесечни преговори на Капитол Хил со огромно мнозинство од двата политички табора.
Американскиот Сенат го усвои пакетот со 86 гласа „за“ и само 11 „против“. Во Претставничкиот дом законот доби зелено светло со 262 гласа, додека 159 конгресмени беа против. Со потписот на Трамп, одлуките стапуваат на сила веднаш, ставајќи ги под дополнителен финансиски товар главните канали за финансирање на руските воени операции.
