Од роботски скари до побрзи блендери со прилагодени диспензери за мраз и млеко, големите синџири на ресторани во САД, вклучувајќи ги Starbucks, Domino’s и Chipotle промовираат нови технологии за автоматизирање на производството, намалување на трошоците за работна сила и потенцијално зголемување на профитните маржи.
Starbucks соопшти дека планира да пушти во употреба машина за правење кафе наречена Siren System, во околу 10% од своите продавници почнувајќи од следната година. Тие тврдат дека баристите кои ја користат машината ќе можат да произведат пијалок многу побрзо и со помалку чекори, правејќи гранде мока фрапучино за 36 секунди наместо за 87.
Со масовниот недостиг на евтина работна сила поради пандемијата, синџирите се префрлија на технолошки инвестиции во нивните кујни за да ја пополнат празнината. Додавањето на алатки за автоматизација во процесите на ваквите ресторани може да го намали времето на чекање, што ќе доведе до поголем ангажман на потрошувачите и ќе ја зголеми продажбата во остатокот од годината, велат директорите на рестораните.
Главниот финансиски директор на Starbucks, Рејчел Руџери, изјави во вторникот дека синџирот на кафетерии предвидува „постабилизирана производствена средина, која ќе помогне да се зголеми маржата во иднина“.
Околу 58% од операторите на ресторани рекоа дека употребата на автоматизација и технологија за да помогне во решавањето на недостигот на работна сила ќе стане почеста оваа година, според извештајот на Националната асоцијација на ресторани во февруари.
Триесет и шест проценти од 1.000 Американци одговорија дека веруваат оти големите синџири на ресторани немаат доволно персонал за да примаат нарачки, да подготвуваат храна и да се справат со испораките.
„Сега повеќето потрошувачи очекуваат нивната локална пицерија и и нивната кафетерија да ја помнат нивната последна нарачка, да знаат која кредитна картичка сакаат да ја користат и да можат брзо и лесно да ја завршат нарачката“, рече Арон Нилсон, главен директор за информации на Jet’s Pizza, синџир со седиште во Мичиген, кој неодамна лансираше телефонски бот со вештачка интелигенција за примање нарачки за пица. „Општеството продолжи понатаму и се очекува автоматизација – дури и од малите компании“.
Chipotle во јули претстави роботски прототип кој сече и лупи авокадото за да го намали времето на подготовка за 50% и да им помогне на вработените да ги подготват нарачките побрзо. Синџирот со седиште во Колорадо, исто така, претстави и двострана скара, на која се готви 70% побрзо.
Domino’s започна неколку проекти за автоматизација во текот на изминатите години. Во 2021 година, Domino’s објави робот за испорака на пица во одредени продавници на локациите во Хјустон. Минатата година, Domino’s Pizza Enterprises објави автоматизиран уред за подготовка на пица во партнерство со Picnic Works, стартап за автоматизација на храна со седиште во Сиетл.
Domino’s додаде и автоматизиран центар за синџири на снабдување во Индијана со машини што прават тесто. Центарот, отворен во март, ќе ги опслужува продавниците на Domino’s низ Индијана, Илиноис, Мичиген и Висконсин.
„Секогаш кога има нова автоматизација, таа создава нови видови на работни места“, рече Гаурав Качава, главен директор за производи во Gupshup, платформа за разговори за пораки. „Тоа нема да биде нето намалување. Мислам дека ќе ја прошири целокупната економија и нејзината ефикасност“.
Извор: Reuters
