Седум ангажирани дела ја добиваат регионалната награда „Штефица Цвек“ на петтото јубилејно издание што ќе се одржи во сабота, на 3 октомври, во КСП „Центар-Јадро“ во Скопје со почеток во 19:30 часот. Настанот е дел од есенската програма на Фестивалот за критичка култура КРИК, во организација на Коалицијата Маргини и Контрапункт. Признанието вреднува феминистички, квир и политички смели книжевни форми објавени на македонски и на БХСЦ јазиците.

Годинашната селекција опфати 82 наслови објавени во текот на 2025 година. Меѓу нив беа застапени романи, поезија, драмски текстови, графички романи, книги за деца и хибридни формати од автори од различни генерации.

Првото жири, во состав Ања Томљеновиќ, Хана Вранац, Емилија Љутиќ, Катица Максан, Дафина Веселиноска и Александра Петровиќ, најпрво направи селекција од триесет дела. Конечната одлука за седумте наслови ја донесе второто жири составено од Фросина Крушкаровска, Борисав Матиќ и Ивана Голијанин.

Именуван по хероината од романот „Штефица Цвек во челустите на животот“ на Дубравка Угрешиќ, изборот задржува ироничен став кон класичните книжевни награди. Наместо прогласување еден победник и поттикнување компетитивност, моделот вреднува повеќе дела истовремено. Целта е отворање простор за критичка книжевност и зајакнување на солидарноста на регионалната сцена.

Фокусот е ставен врз текстови што ги преиспитуваат општествените норми и ја спојуваат политичката ангажираност со автентичен книжевен израз, потсетувајќи дека постојниот поредок не е единствената реалност.

Прогласувањето се одвива под кураторскиот концепт „Грижа: начини да се биде заедно“. Изборот го реализираат Коалиција МАРГИНИ од Скопје, Побунети читателки од Србија, Нараториум од Босна и Херцеговина и Културтрегер/Букса од Хрватска.

Поддршката за иницијативата доаѓа од фондациите Kvinna till Kvinna, Heinrich Böll од Сараево и Реконструкција Женски фонд.