Речиси еден милион млади луѓе во Велика Британија не се вклучени ниту во образованието, ниту на пазарот на трудот, ниту во стручна обука. Британскиот премиер Енди Бернам ја оцени состојбата како „економска катастрофа и морален неуспех“, предупредувајќи дека на цела генерација ѝ се одзема можноста да напредува.

Во авторски текст за весникот „Тајмс“, Бернам порача дека владата треба да инвестира во иднината на младите, наместо да ги покрива последиците од неуспехот преку системот на социјална помош. Се очекува владата подоцна во неделата да ги објави плановите за отворање илјадници работни места наменети за младите.

Речиси милион млади надвор од системот

Според најновите податоци на британската Национална канцеларија за статистика, речиси еден милион луѓе на возраст од 16 до 24 години не се образуваат, не работат и не посетуваат обука. Според премиерот, ова укажува на проблем што не може да се реши само со исплата на социјални надоместоци.

„Ова е економска катастрофа и морален неуспех. Тоа мора да се промени“, напиша Бернам, посочувајќи дека младите мора да добијат реална можност да изградат професионална иднина.

Тој смета дека кризата е резултат на повеќе фактори: двегодишните ограничувања за време на пандемијата, влијанието на социјалните мрежи врз самодовербата и чувството на припадност, образовниот систем што премногу се фокусира на универзитетското образование, недостигот од можности на пазарот на трудот и пропустите на претходните влади.

Социјалната помош треба да води кон можности

Бернам го критикуваше и постојниот систем на социјална поддршка, за кој смета дека често се сведува на процена на правото на надомест и исплата на средствата, без дополнителна помош за вработување или стекнување нови вештини.

Според него, системот треба да се промени така што ќе ги зема предвид амбициите на младите и поддршката што им е потребна за да ги остварат. Наместо фокусот да биде само на утврдувањето на правото на социјални надоместоци, владата треба да понуди обука, советување и конкретни можности за работа.

„Социјалната помош треба да биде последна заштитна мрежа, а не почетна точка“, порача премиерот.

Тој нагласи дека поддршката мора да остане достапна за луѓето што не можат да работат, но и дека владата има обврска да им помогне на оние што би можеле да се вработат доколку добијат соодветна поддршка.

Конзервативната партија, од друга страна, ја оцени владината стратегија за вработување на младите како „катастрофа“. Се очекува најавените мерки да покажат како владата планира да го намали бројот на млади што остануваат надвор од образованието и пазарот на трудот.