Најмалку 15 новороденчиња загинаа во пожар што избувна во болница во Исламабад, главниот град на Пакистан. Пожарот избувнал во одделението за мајки и деца на Пакистанскиот институт за медицински науки (PIMS), јавуваат локалните медиуми. Според првичните информации, пожарот избувнал околу 7 часот наутро по локално време, на третиот кат од одделението. Во просторијата во тој момент имало новороденчиња, а само едно од нив било спасено, според првичните извештаи на Geo TV.

Како можна причина за пожарот се наведува дефект во системот за климатизација, односно експлозија на компресор од клима-уредот во просторијата каде што биле сместени бебињата. Сепак, точната причина треба да биде утврдена со истрага.

Противпожарните и спасувачките екипи брзо пристигнале на местото и го ставиле пожарот под контрола. Областа била обезбедена, а спасувачите продолжиле со интервенцијата и по гаснењето на огнот. Пакистанскиот премиер Шехбаз Шариф наредил итна истрага за трагедијата и побарал да се утврди одговорноста на сите што евентуално придонеле за несреќата.

Бројот на жртвите во првите часови од трагедијата варираше во извештаите. Подоцнежните информации од пакистанските власти и АП наведуваат 14 потврдени жртви, додека локалните медиуми и Ројтерс известуваа за 15.