Вооружен напаѓач отвори оган во јужна Турција, при што загинаа четири лица, а осум беа повредени, објавија локални медиуми.

Инцидентот се случил во округот Тарсус, во покраината Мерсин, според турските медиуми „Хуриет“ и „Си-Ен-Ен Турк“. Пукањето, според првичните информации, започнало во ресторан, по што осомничениот избегал со автомобил.

Турските медиуми објавија дека две лица биле убиени во ресторанот, за кои се верува дека се сопственикот и еден вработен. Напаѓачот потоа продолжил да пука и, според извештаите, усмртил уште две лица во близина.

Полицијата започнала голема операција за пронаоѓање на осомничениот, а во потрагата биле вклучени и хеликоптери. Според медиумските извештаи, осомничениот е 17-годишно момче.

Мотивите за нападот засега не се познати, а турските власти продолжуваат со истрагата.