За време на настан во Тулум, Мексико, на кој настапуваше Solomun, дошло до пукање во близина на локацијата, по што настанот бил прекинат, а полицијата интервенирала на терен. Според првичните информации од локалните власти, инцидентот се случил надвор од самиот простор на настанот, а потврдена е најмалку една жртва.
Полицијата во сојузната држава Кинтана Ру соопшти дека веднаш по пријавата бил обезбеден периметарот, а присутните биле евакуирани без дополнителни инциденти. Според официјалните наводи, нема информации за повредени меѓу посетителите, а истрагата е насочена кон утврдување на мотивите и околностите под кои дошло до пукањето.
Очевидци на социјалните мрежи споделија фотографии и видеа од полициско присуство, амбулантни возила и прекината забава, при што се гледаат посетители кои ја напуштаат локацијата. Дел од објавите укажуваат дека пукањето се случило во непосредна близина на клубот, но не и на самиот подиум.
Организаторите засега не излегоа со детално соопштение, додека од тимот на Соломун нема официјален коментар. Локалните власти апелираат да не се шпекулира додека трае истрагата и најавуваат повеќе информации во текот на наредните денови.
Инцидентот повторно го отвори прашањето за безбедноста на големите музички настани во Тулум, кој последните години стана една од најпопуларните светски дестинации за електронска музика и фестивалска култура.
