Новата книга „Јета“ од писателката Ивана Трајаноска утре (четврток) од 18:30 часот ќе биде промовирана во бистрото Комедија во Скопје. Со авторката ќе разговара Олгица Крстеска, а романот неодамна беше објавен како 249. издание во едицијата ПРОаЗА на издавачката куќа Или-Или.
„Јета“ е роман кој длабоко навлегува во прашањата за идентитетот, припадноста, етничките и верските поделби, како и сложените општествени трансформации на Балканот низ 20 век и постјугословенскиот период.
Главниот лик Кадрије, позната под своето партизанско име Јета, е Албанка од муслиманско семејство од Македонија која учествува во Втората светска војна, а подоцна сама ги одгледува своите деца како самохрана мајка. Преку нејзиниот живот, романот ја следи промената на едно општество – од партизанската борба и социјалистичката обнова, до распадот на Југославија и новите идентитетски и политички судири.
Авторката преку ликот на Јета ја прикажува борбата на една жена да изгради достоинство и личен идентитет во патријархално, етнички и верски поделено општество. Но романот не останува само на нејзината приказна. Наративот се проширува и кон нејзиното мултиетничко семејство, нејзините деца и внуци, прикажувајќи како различните генерации се справуваат со наследените трауми, поделби и идеали за соживот.
„Јета“ отвора и пошироки теми за ксенофобијата, стереотипите и односот кон „другиот“, не само како политичко прашање, туку и како интимна семејна реалност. Романот поставува прашања за тоа како љубовта, стравот, религијата, јазикот и етничката припадност го обликуваат човековиот идентитет.
Книгата, иако силно втемелена во македонскиот и балканскиот контекст, носи и универзални пораки за толеранцијата, човечкото достоинство и можноста за разбирање во поделени општества.
Ивана Трајаноска е родена во Скопје во 1981 година. Таа е универзитетска професорка, писателка, преведувачка и интердисциплинарна истражувачка. Авторка е на романите „Разгледници“ и „Деса“, како и на повеќе раскази објавени на македонски и англиски јазик.
