Кримскиот мост пред долга обнова, Путин се закани со „поболен“ одговор

Експерти проценуваат дека поправките би можеле да траат со години. Рускиот претседател ја отфрли можноста за договор за запирање на нападите врз енергетиката и поморскиот сообраќај
Фото: Социјални мрежи/X

Обновата на Кримскиот мост по украинските напади би можела да трае со години, предупредуваат експерти, додека рускиот претседател Владимир Путин се закани со одговор што ќе биде „многу поболен“ од штетата нанесена на мостот.

Путин на 19 ноември, по разговорите со американскиот и кинескиот претседател во Шенжен, призна дека патниот дел претрпел сериозни оштетувања, но порача дека Русија ќе го обнови. Истовремено ја отфрли можноста за договор за запирање на нападите врз поморската и енергетската инфраструктура.

Обновата на Кримскиот мост

Најголемиот инженерски предизвик е замената на урнатиот челичен лак, долг околу 227 метри. За разлика од повторливите делови на мостот, станува збор за сложена конструкција чие производство, склопување и поставување бараат значително време.

Андреас Капос, професор по градежно и еколошко инженерство на Универзитетот Калифа во Абу Даби, за „Њујорк тајмс“ проценил дека околу две години би биле разумен рок за враќање на сообраќајот. Проценката, пренесена од „Независен“, важи под услов работите да не бидат прекинувани со нови напади и носечките столбови да не се сериозно оштетени.

Пред изградбата на новата конструкција треба да се расчистат подводните остатоци и да се провери состојбата на преостанатите делови. Дополнителни оштетувања на столбовите или темелите би ја усложниле работата.

Рускиот вицепремиер Марат Хуснулин најави дека одделни елементи би можеле да проработат за еден или два месеца. Тоа, сепак, не претставува рок за целосна обнова.

Закана од Путин

Рускиот претседател изјави дека претходно побарал Советот за безбедност да разгледа можни договори за запирање на нападите на море и врз енергетски објекти. По нападите на мостот, рече тој, Москва ќе одговори наместо да преговара за такви договори.

Путин тврдеше дека мостот се користи исклучиво за цивилни цели. Украинскиот претседател Володимир Зеленски, пак, ги претстави нападите како одговор на руските удари врз украинската инфраструктура.

Неизвесен рок

Најновиот напад предизвикал привремен прекин на железничкиот сообраќај. Мостот, долг 19 километри, ги поврзува Русија и Крим, украинскиот полуостров што Москва го анектираше во 2014 година.


Иако руските власти ветуваат поправка, засега нема потврден рок за целосно обновување на патната врска.

е-Трн да боцка во твојот инбокс