Претседателот на Јорданската фудбалска федерација, принцот Али бин Ал Хусеин, излезе со сериозни обвинувања против претседателот на ФИФА, Џани Инфантино. Во официјалното обраќање, јорданскиот сојуз го обвини првиот човек на светскиот фудбал за уцена и неисплаќање на финансиските средства кои им следуваат на националните сојузи. Реакцијата доаѓа во момент кога Инфантино јавно се фали со рекордни приходи и милијарди долари на сметката на ФИФА.

Принцот Али бин Ал Хусеин, кој во минатото беше и еден од главните противкандидати за претседателската функција во ФИФА, упати остри критики кон актуелното раководство. Според јорданскиот сојуз, куќата на фудбалот ги користи финансиските средства како средство за притисок врз одделни федерации.

„ФИФА се фали со милијарди долари приход и рекордна заработка, а од друга страна секојдневно ги доцни или целосно ги блокира исплатите кон сојузите кои ги заработија тие пари на теренот. Ова не е ништо друго освен директна уцена“, се наведува во соопштението.

Инфантино неодамна презентираше финансиски извештаи според кои ФИФА оствари историски највисоки приходи од спонзорски договори и ТВ-права за претстојните турнири. Сепак, повеќе помали и средни национални федерации се соочуваат со сериозни проблеми во секојдневното функционирање поради доцнењето на грантовите за развој на фудбалот.

Јорданскиот сојуз истакнува дека средствата од програмите за поддршка не се милостина, туку регуларно заработени средства кои мора независно да се дистрибуираат без политички условувања од Цирих.

Ова обвинување претставува еден од најсериозните директни напади врз Инфантино во последните неколку години. Принцот Али со години се залага за поголема транспарентност во работењето на ФИФА и за порамномерна распределба на парите од комерцијалните договори.