Македонските превозници денеска од 12 до 14 часот ќе протестираат пред Делегацијата на Европската Унија во Скопје поради проблемите што професионалните возачи ги имаат со правилото 90/180 во Шенген-зоната. На протестот ќе бидат паркирани околу 20 товарни возила, а транспортерите предупредуваат дека доколку на утрешниот состанок во Брисел не биде најдено преодно решение, ќе следуваат нови протести на граничните премини.
Протестот го организира домашната транспортна асоцијација „Макам-транс“ и е дел од координирани активности на превозниците од Северна Македонија, Србија, Босна и Херцеговина и Црна Гора.
Од „Макам-транс“ велат дека проблемот трае веќе седум месеци и дека Европската Унија досега не понудила решение што ќе им овозможи на професионалните возачи непречено да ги извршуваат работните обврски.
„После седум месеци сè уште не е надминат проблемот со престојот, а бидејќи септември е почеток на работите сакаме да испратиме јасна порака да се направи нешто“, изјави за МИА генералната секретарка на „Макам-транс“, Биљана Муратовска.
Правилото 90/180 ги погодува професионалните возачи
Проблемот произлегува од правилото според кое државјаните на земји што не се членки на ЕУ можат да престојуваат во Шенген-зоната најмногу 90 дена во кој било период од 180 дена. Превозниците сметаат дека ова правило не е соодветно за професионалните возачи, чија работа подразбира чести и долги престои во земјите од Шенген.
Според „Макам-транс“, со проблемот се соочуваат околу 17.000 професионални возачи од Северна Македонија, додека на ниво на Западен Балкан бројката достигнува околу 100.000 возачи. Од асоцијацијата велат дека околу 50 отсто од возачите одбиваат да возат поради неизвесноста што ги очекува на границите и различното толкување на правилото од страна на граничните служби.
Владата: Склучуваме билатерални договори
Министерството за транспорт во меѓувреме посочува дека работи на билатерални договори со земји од Шенген-зоната, со кои би се обезбедила покриеност на најважните транспортни рути. Вицепремиерот и министер за транспорт Александар Николоски изјави дека Северна Македонија веќе има договори со Швајцарија, Хрватска и Романија, а во следниот период ќе продолжи да преговара со Австрија, Словенија и Германија.
Целта, според него, е да се опфатат земјите низ кои македонските транспортери најчесто се движат. Од „Макам-транс“, сепак, велат дека досега, освен Хрватска, другите земји немаат јавно потврдени конкретни промени што би го решиле проблемот.
Следен чекор – протести на границите
Превозниците очекуваат нивното прашање да биде разгледано на состанокот на работната група во Брисел на 1 септември. Доколку не биде постигнато преодно решение, предложено е на 14 септември да се одржат протести на граничните премини во секоја од земјите одделно.
Превозниците претходно предупредија дека продолжувањето на проблемот може да предизвика сериозни економски последици за транспортниот сектор, но и за компаниите што зависат од непречен проток на стоки кон европските пазари.
