Преспанскиот Регион добива нова туристичка инфраструктура со воспоставување мрежа од вкупно 188 километри велосипедски и планински патеки. Новите маршрути ќе ги поврзат природните убавини, населените места и туристичките локалитети, отворајќи можности за поинакво истражување на регионот – од брегот на Преспанското Езеро до планинските предели.

Велосипедските патеки ќе ги опфатат Коњско, Стење, Ресен и селата долж западниот брег на езерото, како и населените места во јужниот дел на Преспа, сè до Маркова Нога кај Долно Дупени. Со тоа ќе се создаде поврзана мрежа што ќе им овозможи на посетителите да ги истражуваат регионот и неговите природни и културни богатства со велосипед или пеш.

Видиковци, летниковци и обележани маршрути

Проектот предвидува уредување и обележување на пешачките и велосипедските патеки, поставување патокази, сигнализација и информативни табли, како и изградба на видиковци, летниковци и места за одмор. Пешачките маршрути ќе бидат означени според стандардите за планински патеки, со соодветни патокази и локациски ознаки.

Велосипедските делници ќе добијат посебни маркери и патокази, а на почетните точки на пешачките патеки и на трите главни делници од велосипедската мрежа ќе бидат поставени големи информативни табли. На крајните точки и на други стратешки локации ќе има помали табли со туристички карти и информации за маршрутите.

Преспа како дестинација за активен туризам

Новата инфраструктура треба да помогне во искористувањето на природните и културните потенцијали на Преспа, но и да привлече поголем број домашни и странски туристи. Очекувањата се дека подобрата поврзаност на локалитетите ќе им донесе дополнителна поддршка на локалните бизниси, ќе го поттикне руралниот туризам и ќе создаде нови можности за локалната економија.

Покрај туристичкиот развој, проектот има за цел да придонесе и за зачувување на природните вредности на регионот. Со велосипедските и планинските маршрути, Преспа се позиционира како дестинација за рекреација, планинарење и туризам што овозможува поблиско запознавање со природното наследство.

Активноста се реализира во рамките на програмата „ЕУ за Преспа“, финансирана од Делегацијата на Европската Унија во Македонија, а имплементирана од Програмата за развој на Обединетите нации (УНДП), во партнерство со националните и локалните партнери.