Кризата со шумските пожари во Западна Европа почнува да се смирува, но ситуацијата во Грција останува критична. Додека големите пожари во Франција, Шпанија и Португалија се ставени под контрола, силните ветрови во Грција предизвикуваат ново ширење на огнената стихија и нови евакуации.

Во југозападна Франција пожарникарите успеаја да го локализираат огромниот пожар во Жиронда, по што на околу 198.000 евакуирани жители им беше дозволено да се вратат во своите домови. Пожарот уништи околу 420 квадратни километри борова шума – површина речиси четирипати поголема од Париз.

Во Португалија најголемиот пожар е ставен под контрола, а и во Шпанија повеќето големи жаришта повеќе не се шират, поради што се укинати и дел од наредбите за евакуација.

Најтешка останува состојбата во Грција. Стотици пожарникари се борат со големиот пожар кај Порто Гермено, западно од Атина, каде силниот ветер го турка пламенот кон крајбрежните населби. Околу 300 лица беа евакуирани по морски пат, а властите наредија дополнителни евакуации.

Според локалните власти, повеќе од 100 куќи се изгорени или оштетени, додека пожарот се шири на три активни фронта. Во гаснењето учествуваат околу 500 пожарникари, специјализирани тимови од Франција и Романија, како и 19 противпожарни авиони и 11 хеликоптери.

Нови пожари избувнаа и во други делови на Грција, меѓу кои и во областа Ахаја на Пелопонез, каде што е наредена евакуација на неколку села. Според грчките власти, силните ветрови создаваат исклучително тешки услови за гаснење, бидејќи им го отежнуваат пристапот на противпожарните авиони.

Европската климатска служба „Коперник“ предупредува дека Европа се затоплува побрзо од кој било друг континент, а високите температури и продолжените суши создаваат услови пожарите да се шират побрзо и да бидат сè поразорни. Освен големите материјални штети, експертите предупредуваат дека милиони диви животни веќе настрадале во овогодишната огнена сезона.