По смртта на Билјана, за петок, 6 ноември, е најавен протест во Богданци против фемицидот и насилството врз жените. Граѓаните се повикани да се соберат во Градскиот парк во 19 часот и да побараат институциите да ги заштитуваат жртвите пред насилството да заврши со загубен живот.

Повикот на социјалните мрежи го објави Александра Сапова. Собирот е посветен на Билјана, но и на сите жени што живеат во страв од насилство.

„Повикуваме на мирен протест во чест на прерано згаснатиот живот на нашата сограѓанка Билјана. Нејзиниот глас е замолчен, но нашиот мора да биде погласен од кога било“, се наведува во повикот.

Протест во Богданци со барање за одговорност и итна акција

Организаторите порачуваат дека борбата против фемицидот не смее да почнува дури по трагедија. Бараат навремена реакција на институциите, вистинска заштита на жртвите и конкретни мерки за спречување нови случаи на насилство.

„Фемицидот мора да се спречи ПРЕД да се случи! Кога ќе се случи, веќе е доцна“, нагласуваат во објавата.

Според нив, секој изгубен живот е системски неуспех, а секоја премолчена жртва е заеднички пораз. Затоа повикуваат заканите и пријавите за насилство да се третираат сериозно, со мерки што ќе обезбедат безбедност за загрозените жени.

Во повикот се нагласува дека протестот нема партиски карактер. Целта, како што наведува Сапова, е заедничко барање за правда и заштита, а не политичка пресметка.

„Ова е крик за опстанок и повик за правда. Ова е повик од жени, мајки, сопруги, сестри, ќерки… Повик од луѓе за луѓе“, порачува таа.

Собирот ќе се одржи под пораките „Стоп за фемицидот“, „Правда за Билјана“ и „Ниту една повеќе“. Организаторите повикуваат на солидарност со нејзиното семејство и со сите жртви на родово базирано насилство.