Пожарникарите и локалните екипи во Кавадаречко влегуваат во дежурство и тешка борба со огнот во текот на ноќта. Шумскиот пожар што избувна попладнево меѓу селата Фариш и Дреново сè уште не е ставен под контрола. Непристапниот терен и силниот ветар дополнително ја отежнуваат ситуацијата на терен, додека надлежните служби мобилизираат дополнителни ресурси за да го спречат неговото понатамошно ширење кон населените места.

Пожарот избувна во попладневните часови и брзо зафати поголема површина под нискостеблеста шума и сува трева. Според информациите од противпожарните единици, главниот предизвик за екипите е неповолниот ветар кој постојано го менува правецот и овозможува брзо проширување на пламенот.

Поради непристапноста на теренот, пристапот со противпожарни возила на одредени локации е оневозможен. Пожарникарите се принудени пешки, со грбни прскалки и рачен алат да се борат со жариштата.

Со цел огнот да не се доближи до куќите и инфраструктурата во околните села, на терен се распоредени дежурни тимови кои ќе останат активни во текот на целата ноќ. Поддршка на противпожарните екипи им даваат и локални жители, како и претставници од јавните претпријатија.

Надлежните апелираат до граѓаните на максимална внимателност и воздржување од какви било активности кои можат да предизвикаат дополнителни искри или нови жаришта во овој критичен период.