Биографската книга „Фудбал под сенка“, посветена на легендарниот македонски фудбалер Васил Рингов, ќе биде промовирана на 17 април во книжарницата „Литература.мк“ во „Дајмонд мол“, со почеток во 20 часот.
Книгата е напишана од новинарот Срѓан Ивановиќ, а излегува постхумно, неколку месеци по смртта на Рингов, кој активно учествувал во нејзиното создавање. Промоцијата ќе се одржи токму на денот кога е роден, 17 април.
Изданието, кое го објавува „Арс Либрис“, дел од „Арс Ламина – публикации“, ќе го претстават авторот Срѓан Ивановиќ, уредничката Бисера Бендевска и Марио Рингов, еден од синовите на славниот фудбалер. На настанот ќе зборуваат за процесот на создавање на книгата, но и за животот и наследството на Васил Рингов.
„Фудбал под сенка“ ја раскажува животната и спортската приказна на Рингов во прво лице, нудејќи поглед не само кон неговата фудбалска кариера, туку и кон личните дилеми, ставови и вредности што го обликувале како спортист и како човек. Во воведот на книгата, Рингов порачува дека конечно добил шанса сам да ја раскаже својата приказна, без цензура и без премолчување на работите што му тежеле.
Васил Рингов е едно од најпрепознатливите имиња во македонскиот и југословенскиот фудбал. Роден е на 17 април 1955 година во Струмица, кариерата ја почнал во Беласица, а потоа играл и за Партизан, Тетекс, Динамо Загреб и Ајнтрахт Брауншвајг. Најголема трага остави во Вардар, каде што стана една од клучните фигури во 1980-тите. За клубот одиграл повеќе од 200 натпревари и постигнал 93 гола.
Рингов почина на 23 декември 2025 година во Скопје, на 70-годишна возраст. Со оваа книга, неговата приказна добива нов живот, не само како спомен на голем фудбалер, туку и како лично сведоштво за времето, клубот и луѓето што го обележале.
