Секој збор што го пишуваме до ВИ алатки како ChatGPT или Gemini има своја енергетска цена. Можеби звучи претерано, но нов извештај на Институтот за вода, животна средина и здравје при Универзитетот на Обединетите нации предупредува дека еколошкиот отпечаток на вештачката интелигенција станува сè повидлив.
Според извештајот, ChatGPT обработува околу 2,5 милијарди барања дневно. Дури и со конзервативна проценка од 0,42 ват-часови по барање, тоа би значело околу 383 гигават-часови електрична енергија годишно. За споредба, тоа е доволно за годишните потреби за струја на речиси три милиони луѓе во Супсахарска Африка.
Должината на прашањето исто така има значење. Колку повеќе зборови и токени обработува моделот, толку повеќе енергија се троши за одговорот. Извештајот наведува дека ако секојдневните интеракции се скратат за околу 30 отсто, потрошувачката по барање би можела да се намали за околу 25 отсто. На годишно ниво, тоа би значело заштеда од 87 до 98 гигават-часови струја.
Не трошат сите ВИ задачи исто. Кратко текстуално прашање е многу помалку енергетски интензивно од генерирање слика или видео. Според извештајот, една AI слика може да потроши околу 2,9 ват-часови, додека сложените видеа можат да достигнат и повеќе од 400 ват-часови по генерирање.
Тоа не значи дека треба да престанеме да користиме вештачка интелигенција, особено кога таа помага во работа, учење, преведување, истражување или секојдневни задачи. Но значи дека масовното и непотребно користење, особено за бескрајни слики, мемиња и кратки видеа без вистинска вредност, има цена што не ја гледаме веднаш.
Еден од наједноставните начини за помал отпечаток е пократко и појасно прашање. Наместо долги воведи и непотребни љубезности, доволно е барањето да биде конкретно. Кога задачата е едноставна, може да се користи и полесен модел, ако платформата го овозможува тоа.
Во свет во кој ВИ станува дел од секојдневието, прашањето повеќе не е само што може да направи технологијата, туку и колку ресурси троши додека ни одговара. Малите навики, кога ги повторуваат милиони луѓе секој ден, можат да направат голема разлика.
