Администрацијата на Доналд Трамп започна со обработка на барањата за враќање на повеќе од 166 милијарди долари царини, неколку месеци откако Врховниот суд на САД пресуди дека тие биле незаконски воведени. Според The Guardian, активиран е нов дигитален систем за обработка на барањата, со што официјално започнува процесот на рефундација за илјадници компании погодени од мерките.
Судска одлука што го смени текот
Во февруари, Врховниот суд пресуди дека законот за вонредни состојби од 1977 година, на кој се повикуваше администрацијата, не дава овластување за воведување ваков обем на царини. Одлуката ја образложи главниот судија Џон Робертс, а ја поддржаа и судии именувани токму од Трамп
Новиот дигитален систем, наречен „Cape“, во првата фаза може да обработи околу 63% од погодените увозни пријави, додека останатите ќе бидат вклучени подоцна. Американските царински служби признаа дека инфраструктурата морале да ја изградат практично од нула.
Компаниите што ќе поднесат барање може да очекуваат исплата во рок од 60 до 90 дена.
Кој има право на враќање?
Право на рефундација имаат исклучиво компаниите што директно ги платиле царините – главно увозници и големи корпорации. Меѓу нив се и Skechers, Toyota, Nintendo of America, FedEx и Costco.
Граѓаните, иако индиректно ги платиле овие трошоци преку повисоки цени на производите, нема да добијат директен поврат. Потенцијалната корист за нив ќе зависи од тоа дали компаниите ќе ги намалат цените или ќе ги задржат средствата.
Системот засега ќе обработува само барања поврзани со понови увози, додека случаи поврзани со правни спорови или антидампинг истраги ќе треба да почекаат.
Овој процес претставува еден од најголемите финансиски поврати во поновата економска историја на САД и отвора прашања за тоа како ваквите одлуки ќе влијаат врз пазарот, компаниите и крајните потрошувачи.
