Една од пионерките на домашната анимација, Тонкица Митровска, почина на 78-годишна возраст, соопшти Друштвото на филмските работници на Македонија. Таа беше долгогодишен активен творец и значаен столб на прочуената Скопска анимирана школа во рамките на некогашното студио на „Вардар филм“. Зад себе остави творечки опус вграден во повеќе од дваесет анимирани дела што ја испишаа историјата на македонската кинематографија.

Родена во 1948 година, Митровска дипломираше на отсекот за графика и брзо стана дел од авторското јадро што го создаваше препознатливиот визуелен ракопис на македонската анимација.

Работејќи во Студиото за анимиран филм при „Вардар филм“, таа делуваше како цртач, фазер и аниматор. Во период кога македонската анимација освојуваше простор на фестивалите, Митровска тесно соработуваше со водечките домашни режисери и автори, градејќи ја сцената во времиња кога секој кадар се црташе рачно на целулоид.

За својот долгогодишен ангажман, Друштвото на филмските работници на Македонија во 2021 година ѝ ја додели наградата „Златна рамка“. Две години подоцна, во 2023 година, Кинотеката на Македонија го заокружи вреднувањето на нејзината работа со признанието „Златен објектив“.

„Македонската филмска фела изгуби извонреден професионалец, предан колега и тивок уметнички генијалец чиј ведар дух и скромност беа инспирација за генерации филмски автори. Нејзиното дело останува трајно вградено во колективната културна меморија и во темелите на нашата кинематографија“, наведе ДФРМ во своето официјално соопштение.