Иранскиот претседател Масуд Пезешкијан им нареди на властите интернет-конекцијата во земјата да ја вратат на нивото што постоеше пред масовните протести и повеќенеделното ограничување на пристапот до мрежата. Одлуката доаѓа по силниот притисок од јавноста, економските проблеми и растечките критики поради долготрајната дигитална блокада во земјата.

Иранските власти во изминатите недели воведоа речиси целосна контрола на интернетот за време на протестите и немирите низ земјата, оправдувајќи го потегот со безбедносни причини и обид за спречување на ширење насилство и организирање демонстрации преку социјалните мрежи.

Властите најавија постепено враќање на мрежата

Според извештаите на иранските медиуми и претставници од телекомуникацискиот сектор, процесот на враќање на интернетот треба да се спроведе фазно, со постепено обновување на пристапот до меѓународните платформи и сервиси, пренесува YeniSafak.

Шефот на иранската телекомуникациска инфраструктура Бехзад Акбари изјави дека проблемите со конекцијата би можеле да бидат решени „денес или утре“, откако Врховниот совет за национална безбедност одобрил повторно поврзување на земјата на мрежата. Сепак, одредени извори наведуваат дека и по формалното враќање на интернетот ќе остане одреден степен на контрола и ограничување на пристапот до одделни платформи и содржини.