Како што деновите стануваат пократки, а вечерите посвежи, сè повеќе време поминуваме дома. Токму тогаш добрата книга, шолјата топол пијалак и неколкуте мирни часови можат да бидат сосема доволни за одмор од секојдневните обврски. За ваквите вечери издвојуваме пет романи кои привлекоа голем број читатели и важат за едни од најчитаните наслови.

Првиот предлог е „Пред да се излади кафето“ од Тошиказу Кавагучи. Во едно мало токиско кафуле се крие необична можност: гостите можат накратко да се вратат во минатото, но мора да почитуваат строги правила. Најважното меѓу нив е дека мора да се вратат во сегашноста пред нивното кафе да се излади. Преку неколку поврзани приказни, романот зборува за односите, неизговорените зборови, загубата и желбата уште еднаш да разговараме со саканите.

Втората книга е „Деновите во книжарницата Морисаки“ од Сатоши Јагисава. По љубовното разочарување, главната јунакиња Такако се повлекува од дотогашниот живот и ја прифаќа понудата на својот вујко да се пресели во мала соба над семејната книжарница во Токио. Окружена со полици стари книги и нови луѓе, Такако постепено почнува поинаку да гледа на работите. Ова е роман за новите почетоци и промените што доаѓаат кога најмалку ги очекуваме.

Третиот наслов е „Тоа што го бараш, ќе го најдеш во библиотеката“ од Мичико Аојама. Приказната се врти околу библиотекарката Сајури Комачи, која на своите посетители не им препорачува секогаш книги што ги очекуваат, туку на секого му го наоѓа токму оној наслов што ќе му помогне да го погледне сопствениот живот од друга перспектива.

Четвртата препорака е „Свежа вода за цвеќиња“ од Валери Перен. Виолет Тусен е чуварка на гробишта во мало место во Бургундија. Нејзиното секојдневие е исполнето со посетители и нивните животни приказни, сè додека не се појави еден непознат маж со необична желба на својата покојна мајка. Иако дел од дејството се одвива на гробишта, романот пред сè зборува за животот, љубовта, надежта и можноста за нов почеток.

Петтата книга е „Неверојатно бистри суштества“ од Шелби Ван Пелт. Това Саливан работи ноќна смена во аквариум, каде што се запознава со Марцелус, исклучително интелигентен џиновски пацифички октопод. Од нивната необична средба се развива пријателство кое постепено ги отвора прашањата од минатото на Това, спојувајќи ги мистеријата, хуморот и топлината.