Американското Министерство за одбрана подготвува планови за можна интервенција во Куба, но конечната одлука зависи од претседателот Доналд Трамп.
Пентагон забрзано работи на подготовка на сценарија за можна воена операција во Куба, во случај американскиот претседател Доналд Трамп да даде наредба за интервенција.
Според информации од извори запознаени со процесот, станува збор за конкретни подготовки што би можеле брзо да се активираат, што претставува нова ескалација на тензиите меѓу САД и Куба.
Тензиите меѓу двете земји се засилија на почетокот на годината, кога администрацијата на Трамп воведе дополнителен притисок врз Хавана, вклучително и ограничување на испораките на нафта. Овие мерки придонесоа за сериозна енергетска и економска криза на островот.
Во меѓувреме, се појавија и информации дека во Вашингтон веќе кружат планови за ескалација, додека дипломатските обиди за намалување на тензиите се во рана фаза и без гаранција за успех.
Иако американската администрација последниве недели е фокусирана на конфликтот со Иран, реториката кон Куба дополнително се заострува. Трамп неодамна изјави дека САД би можеле „да направат нешто со Куба многу скоро“, што дополнително ги зголеми стравувањата од интервенција.
Кубанските власти веќе најавија дека ќе одговорат во случај на напад, нагласувајќи дека суверенитетот на земјата не е предмет на преговори.
Покрај тоа, ситуацијата дополнително се влоши по американската операција во Венецуела, што отвори шпекулации дека Куба би можела да биде следната цел во поширокиот геополитички конфликт во регионот.
САД со децении разгледуваат можности за интервенција на островот, уште од доаѓањето на власт на Фидел Кастро во 1959 година. Денешната криза, комбинирана со економски притисок и политички тензии, повторно го става тоа прашање во фокус.
