Пентагон во последните недели ја подигнал проценката за контраразузнавачката закана што ја претставува Израел на највисоко, „критично“ ниво, објави NBC, повикувајќи се на сегашни и поранешни американски функционери.

Новата оценка доаѓа во период на растечки тензии меѓу САД и Израел околу насоката на војните во Иран и Либан. Според извештајот, во Пентагон постои засилена загриженост дека Израел шпионира високи американски функционери за да добие информации за внатрешните размислувања на Вашингтон за регионалните конфликти.

Според NBC, Одбранбената разузнавачка агенција на Пентагон во интерна порака ја подигнала заканата од Израел на „критично“ ниво. Еден американски функционер изјавил дека проценката вклучува и документ од седум страници во кој се наведени конкретни инциденти што предизвикале загриженост кај САД.

Функционерите оценуваат дека израелските разузнавачки активности ја надминуваат вообичаената шпионажа што понекогаш се очекува и меѓу сојузнички држави. Сепак, не е јасно дали еден конкретен инцидент бил причина за подигнување на нивото на закана.

Белата куќа и израелската амбасада во САД остро го демантираа извештајот на NBC, додека Пентагон одби да коментира.

Портпаролот на израелската амбасада во Вашингтон изјави дека тврдењата дека Израел шпионира САД се „целосно лажни“.

„Израел не собира разузнавачки информации за американски субјекти, а уште помалку за функционери на американската влада“, изјави портпаролот.

Од Белата куќа, пак, порачаа дека „целата приказна е лажна“ и дека доаѓа од лице кое „нема никакво знаење за тоа што се случува“.

Според функционери цитирани од NBC, најверојатната последица од новата проценка ќе биде тоа што американските претставници ќе преземаат поголеми мерки на претпазливост при патувања во Израел или при средби со израелски колеги.

И покрај тоа, засега нема индиции дека проценката влијаела врз секојдневната размена на разузнавачки информации на високо ниво меѓу двете земји, особено во врска со војната во Иран.