Пеколниот бран во Македонија ќе го достигне својот максимум утре со дневни температури кои повторно ќе надминат 40 степени, по што од недела следува постепено разладување со пороен дожд, грмежи и локална појава на град. По денешните максимални 40 степени измерени во Велес и во Скопје на мерното место Зајчев Рид, синоптичарите најавуваат пресврт во временските прилики во втората половина од претстојниот викенд.
Саботата носи сончево и многу топло време со мала до умерена облачност. Дневните температури на повеќе места ќе се задржат блиску до 40-тиот степен, а локално повторно ќе го надминат овој праг. Попладне, претежно во планинските предели, ќе има услови за изолиран пороен дожд и грмежи. Ќе дува слаб до умерен ветер од западен и северозападен правец. Во Скопје времето ќе остане многу топло со умерен северозападен ветер.
Промената на времето започнува во недела попладне. Иако максималните температури ќе се движат меѓу 33 и 40 степени, во попладневните часови ќе дојде до зголемување на облачноста проследено со пороен дожд, грмежи и засилен ветер. Метеоролозите предупредуваат и на изолирано невреме со силен ветер и појава на град.
Нестабилното време ќе продолжи и во понеделник, 24 август, кога максималните температури ќе паднат во интервал од 31 до 38 степени. Ќе преовладува променливо облачно време со сончеви периоди, а во попладневните часови повторно ќе има услови за локално невреме со пороен дожд и град.
Од вторник следува стабилизација со свежи утра од 12 до 19 степени и максимални температури до 39 степени.
