Ниту Birkin чантичките не останаа имуни на војната. Францускиот луксузен бренд Hermès пријави послаб раст на продажбата од очекуваниот во првиот квартал, по што акциите на компанијата паднаа и до 14 отсто во текот на денот. Компанијата како клучни причини ги посочи војната на Блискиот Исток, падот на туристичката потрошувачка и помалиот број посетители во луксузните трговски центри.
Во првите три месеци од 2026 година, продажбата на Hermès пораснала за 5,6 отсто по прилагодување на валутните ефекти, што е под очекувањата на аналитичарите, кои прогнозирале раст од 7,1 отсто. Особено силен удар имало на Блискиот Исток, каде продажбата паднала за 6 отсто, а само во март приходите во трговските центри се намалиле за околу 40 отсто. Компанијата ги посочи Обединетите Арапски Емирати, Кувајт, Катар и Бахреин како најпогодени пазари.
Последиците не се почувствувале само во регионот на Заливот. Hermès пријави и пад од 2,8 отсто во Франција, една од најважните европски дестинации за луксузен шопинг, токму поради помалиот број побогати туристи. Reuters наведува дека помал туристички сообраќај и послаба потрошувачка се почувствувале и на други европски пазари, додека САД засега остануваат посветла точка за компанијата, со раст на продажбата од 17,2 отсто.
Падот на Hermès не е изолиран случај, туку дел од поширок проблем што го погодува целиот сектор на луксузна стока. И LVMH, сопственик на Louis Vuitton, Dior и Moët & Chandon, деновиве соопшти дека војната со Иран му оттурнала најмалку еден процентен поен од кварталниот раст, додека продажбата на Блискиот Исток и во travel retail сегментот значително ослабела. И Kering, сопственик на Gucci, предупреди дека конфликтот дополнително ја отежнува веќе кревката состојба во секторот.
Проблемот не е само во директната продажба во бутиците, туку и во целиот екосистем што го храни луксузниот пазар: авиосообраќај, аеродромски шопинг, безбедносна перцепција и туристичка мобилност. Според Reuters, аеродромите и трговските центри во Дубаи, Кувајт и други заливски точки биле погодени од намален сообраќај, затворања и помала потрошувачка, што директно ги притиска брендовите што зависат од патници со висока куповна моќ.
И покрај ова, Hermès се обидува да испрати порака на стабилност. Компанијата наведува дека побарувачката за нејзините чанти и кожна галантерија останува силна, а токму тој сегмент забележал раст од 9 отсто во првиот квартал. Извршниот директор Аксел Дима изјави дека брендот останува верен на долгорочната стратегија и се потпира на креативноста, квалитетот и лојалноста на купувачите како основа за идниот раст.
