Во основното училиште „Ванчо Прќе“ во Штип синоќа бил извршен вандалски упад, при што се оштетени дел од училниците, инвентарот и училишната опрема. Поради инцидентот, денеска нема редовна настава за повеќе од 1.100 ученици.
Според информациите, маскирано лице околу полноќ насилно влегло во училиштето, кое се наоѓа во централното градско подрачје. Претходно, според првичните сознанија, биле неутрализирани дел од безбедносните камери.
Во објектот бил оштетен инвентар, меѓу кој и монитори, а на ѕидовите биле испишани графити со недолична содржина. Според сведочења од училиштето, биле пуштени и чешмите, а најголемиот дел од штетата е направен во просториите каде се одвива настава за учениците од петто до деветто одделение.
Од СВР Штип информираа дека случајот бил пријавен утрово.
„На 30.04.2026 година, во 06:18 часот, во СВР Штип е пријавено дека во основно училиште на подрачјето на Штип, едно лице насилно влегло во просторија на училиштето, при што оштетило дел од инвентарот, монитори, и испишало графит со недолична содржина. Се преземаат мерки за расчистување на случајот“, соопштија од полицијата.
Директорот на училиштето изјави дека, според снимките од безбедносните камери, станува збор за едно лице. Тој очекува кабинетите да бидат оспособени во рок од три дена, за наставата да може да продолжи од почетокот на следната недела. Родителите и учениците дополнително ќе бидат информирани.
Во приземјето на училиштето, според првичните информации, нема значително оштетување.
Ова е прв ваков инцидент во најголемото основно училиште во Штип. Висината на материјалната штета ќе биде утврдена по увидот и проценката, а истрагата треба да ги утврди сторителот и мотивите за упадот.
Инцидентот предизвика вознемиреност во штипската јавност и отвори прашања за безбедноста во училиштата, функционалноста на алармните системи и потребата од дополнителна заштита на образовните установи.
