Многумина сонуваат за сопствен имот покрај море, но високите цени на недвижностите тоа го прават речиси недостижно. Затоа веста дека цел грчки остров се продава по цена на просечен стан звучи неверојатно. Сепак, зад ниската цена се кријат сериозни проблеми.

Станува збор за островот Макри, кој се наоѓа во Јонското Море и е дел од архипелагот Ехинади. Островот е познат по чистото море, недопрената природа и мирната атмосфера, далеку од масовниот туризам кој ги зафати многу грчки летувалишта.

Кога првпат бил понуден на пазарот во 2022 година, неговата вредност била проценета на околу осум милиони евра. Денес, пак, се продава на аукција за само 247.000 евра.

Главната причина за огромниот пад на цената се правните и финансиските проблеми. Островот е класифициран како приватна шума и се наоѓа во заштитена природна зона, што значително ја ограничува изградбата на хотели и туристички комплекси.

Дополнителен проблем е тоа што Макри е дел од европската еколошка мрежа „Натура 2000“, па за секоја поголема инвестиција се потребни посебни државни дозволи и долг административен процес.

Покрај тоа, со островот доаѓаат и долгови кои достигнуваат најмалку 20 милиони евра. На островот нема ниту основна инфраструктура, како струја, вода и систем за отпад, па идниот сопственик би морал сам да инвестира во сè.

И покрај сите пречки, идејата за приватен остров во Грција и понатаму привлекува внимание. За некој со доволно капитал и трпение, Макри би можел да биде необична, но потенцијално интересна инвестиција.