Безбедносниот експерт Марк Блашчик открил сериозна ранливост што ги погодува уредите со „Андроид 12“ и понови верзии на оперативниот систем. Проблемот е поврзан со приемот на специјално приспособена СМС-порака од типот WAP Push, која телефонскиот потсистем на „Андроид“ не може правилно да ја обработи.

Она што го прави нападот особено загрижувачки е тоа што не бара никаква реакција од корисникот. Не станува збор за вообичаена измама во која треба да кликнете на линк или да отворите прилог – доволно е пораката да пристигне на телефонот.

Како што пренесува „ГСМ Арена“, проблемот е во начинот на кој оперативниот систем ја обработува примената порака. Наместо едноставно да ја прикаже во сандачето за пораки, „Андроид“ се обидува да ја обработи во заднина. Тој процес предизвикува грешка што може да доведе до низа проблеми во функционирањето на уредот.

Активните телефонски повици може непредвидливо да се прекинуваат, а телефонот привремено да ја изгуби врската со мобилната мрежа.

Повеќе злонамерни пораки може да го направат телефонот неупотреблив

Состојбата може дополнително да се влоши ако напаѓачот испрати повеќе вакви пораки една по друга. Во таков случај телефонот може целосно да престане да функционира нормално. Враќањето на уредот во работна состојба може да биде особено тешко, а во повеќето случаи, според објавените информации, потребна е стручна техничка помош.

„Гугл“ објави поправка, но не за сите верзии на „Андроид“

Иако „Гугл“ во мај првично го негирал постоењето на безбедносниот пропуст по пријавата од истражувачите, инженерскиот тим задолжен за „Андроид“ подоцна пронашол решение. Поправката е вклучена во октомвриската безбедносна надградба, но не е достапна за сите уреди. Според написот на „Баг“, таа е испорачана само за телефони со „Андроид 14“ и понови верзии.

Решението функционира така што системот автоматски препознава една од 20 потенцијално злонамерни пораки и веднаш ја брише, наместо да се обиде да ја обработи и да предизвика дефект.

Корисниците со постари уреди што сè уште користат „Андроид 13“ или постара верзија засега немаат конкретна поправка за овој пропуст и може да останат изложени на ризик. За оваа конкретна ранливост, можностите за заштита се ограничени доколку уредот не ја добил соодветната безбедносна надградба. Затоа е важно редовно да се проверува дали производителот објавил нови системски и безбедносни ажурирања.