Секој паметен телефон користи радиофреквенциски бранови за комуникација со мобилните мрежи. Но количината енергија што ја апсорбира ткивото при лабораториски тестирања може значително да се разликува од еден до друг модел.
Врз основа на податоците на германската Федерална канцеларија за заштита од зрачење (BfS), направена е споредба на 15 популарни паметни телефони според нивната максимална специфична стапка на апсорпција за главата, позната како САР (SAR), изразена во вати на килограм (W/kg).
Мерењата овозможуваат стандардизирана споредба на уредите, но повисоката вредност на САР не значи нужно и поголем здравствен ризик. Радиофреквенциските бранови што ги користат мобилните телефони се нејонизирачко зрачење, за разлика од рендгенските зраци. Здравствените институции досега не утврдиле дека изложеноста на радиофреквенциско зрачење од мобилните телефони, во рамките на важечките безбедносни граници, предизвикува штетни последици по здравјето.
Резултатите може да се разликуваат и во зависност од тоа дали телефонот се тестира во близина на главата или на телото.
На првите две места на листата се моделите на „Епл“ – „Ајфон 17“ и „Ајфон 16е“, меѓу кои разликата е само 0,01 W/kg. По нив следува „Самсунг Галакси З Фолд7“ со 1,40 W/kg, пред „Галакси С26“ со 1,21 W/kg.
На другиот крај од листата е „Самсунг Галакси А16 5Г“, со најниска измерена вредност меѓу 15-те уреди – 0,38 W/kg.
Зрачењето се разликува во зависност од тоа дали се мери кај главата или телото
Позицијата на телефонот на листата може да се промени во зависност од тоа дали се споредува САР-вредноста за главата или за телото. „Моторола Разр 60“ е на 11. место според вредноста за главата, со 0,84 W/kg. Но неговата вредност за телото изнесува 1,39 W/kg, што е четврта највисока вредност меѓу анализираните уреди.
Сличен пример е и „Гугл Пиксел 9“: неговата САР-вредност за телото е 1,40 W/kg, додека за главата изнесува 0,99 W/kg. „Ајфон 17“, пак, бележи 1,49 W/kg во двете мерења.
Овие резултати произлегуваат од различни стандардизирани лабораториски тестирања и не ја претставуваат типичната секојдневна изложеност на корисниците.
Зошто телефоните имаат различни вредности на САР?
Мерењата не покажуваат доследна поврзаност меѓу вредностите на САР и брендот, цената или генерацијата на телефонот. Моделите „Гугл Пиксел 9“ и „Пиксел 10“ имаат иста максимална вредност за главата – 0,99 W/kg. Истото важи и за „Поко Икс7 Про“ и „Шаоми 17“, кај кои вредноста изнесува 1,00 W/kg.
Трите модели на „Моторола“ се во релативно тесен опсег: од 0,84 W/kg кај „Разр 60“ до 0,95 W/kg кај „Еџ 60“.
На резултатите може да влијаат повеќе фактори, меѓу кои дизајнот на антената, работните фреквенции и условите во кои се врши тестирањето. Бидејќи вредностите се специфични за секој модел, не може да се користат за процена на целата марка.
Дали повисоката вредност на САР значи и поголем ризик за здравјето?
Не нужно. САР ја мери максималната брзина со која ткивото ја апсорбира радиофреквенциската енергија во стандардизирани услови. Таа не ја покажува вкупната изложеност на човекот во текот на еден обичен ден. Количината радиофреквенциска енергија што ја емитува телефонот се менува во зависност од јачината на сигналот и условите на мрежата. И растојанието меѓу телефонот и главата има улога: користењето звучник или слушалки може да ја намали изложеноста.
За разлика од јонизирачкото зрачење, радиофреквенциските бранови немаат доволно енергија за директна јонизација на атомите или за оштетување на ДНК на начинот на кој тоа можат да го направат рендгенските зраци.
Според американската Агенција за храна и лекови (ФДА), досегашните научни докази не укажуваат на поврзаност меѓу радиофреквенциското зрачење од мобилните телефони и здравствените проблеми. Сепак, истражувањата и следењето на безбедноста продолжуваат.
На крајот, листата ги споредува максималните вредности на САР измерени во лабораториски услови. Таа не покажува кои телефони се побезбедни или поопасни за секојдневна употреба, ниту може сама по себе да послужи како мерило за здравствениот ризик.
