Во 2025 година, граѓаните од Македонија реализирале 12,4 милиони онлајн трансакции во странство со вкупна вредност од 427,8 милиони евра, покажува анализа на Асоцијацијата за е-трговија, изработена врз основа на податоци од Народната банка. Најмногу пари завршиле за авиобилети, хотелски резервации и купувања преку големи платформи како Temu и Amazon.
Македонците не штеделе на онлајн купувања во странство во текот на 2025 година. Според анализата на Асоцијацијата за е-трговија, со платежни картички биле направени 12,4 милиони онлајн трансакции, а вкупната вредност достигнала 427,8 милиони евра.
Најголем дел од средствата биле потрошени за услуги и производи поврзани со патувања, пред сè за авиобилети и хотелски резервации, но и за купување преку глобални платформи како Temu и Amazon. Овие бројки, според анализата, покажуваат дека прекуграничната е-трговија продолжува силно да расте.
Во споредба со 2024 година, вредноста на онлајн трансакциите е зголемена за 50 проценти, додека бројот на трансакции пораснал за 69 проценти. Просечната вредност на една трансакција изнесувала 34 евра, што е за 11 проценти помалку од претходната година.
Најголем дел од онлајн плаќањата биле реализирани во Ирска, Холандија, Обединетото Кралство, САД, Унгарија, Германија, Кипар и Луксембург. Според анализата, дури 74 проценти од вкупната вредност и 83 проценти од бројот на трансакции се поврзани токму со овие земји. Ирска е на врвот со 92,1 милион евра и 4,8 милиони трансакции, додека Холандија следи со 62,4 милиони евра.
Најголем раст на бројот на трансакции е забележан во Германија и Кипар, додека пад има во Луксембург и Обединетото Кралство. Во однос на просечната вредност на трансакција, највисока е во Унгарија, каде што изнесува 152,2 евра, а најниска во Луксембург, со 14,1 евра.
Претседателката на Асоцијацијата за е-трговија, Нина Ангеловска Станков, оценува дека овие трендови упатуваат на пошироки структурни промени во глобалната е-трговија. Според неа, високото учество на Ирска е поврзано со тоа што таму се лоцирани европските операции на компании како Amazon, Google, Meta и Apple, а таму се процесираат и плаќањата за Temu и за бројни дигитални услуги. Холандија, пак, има силна улога како е-commerce и логистички центар, но и како седиште на Booking.com, што ја објаснува нејзината позиција кај патувањата и резервациите.
