Боди текст:
Златко Далиќ ја заврши својата осумгодишна мисија на клупата на хрватската фудбалска репрезентација по елиминацијата од Португалија на Светското првенство 2026. Во 111 натпревари, Далиќ ја претвори Хрватска во една од најуспешните репрезентации во светот, освојувајќи три големи медали, сребро на Мундијалот во Русија 2018, бронза во Катар 2022 и сребро во Лигата на нации 2023.
Кога го презеде тимот во октомври 2017 година, Далиќ беше привремено решение во момент кога Хрватска се бореше за пласман на Светското првенство. Само неколку недели подоцна, по победата над Украина и успешните баражи против Грција, избори пласман во Русија, турнирот кој ќе ја испише најголемата страница во историјата на хрватскиот фудбал.
На Мундијалот во 2018 година, Далиќ создаде тим кој го воодушеви светот. Хрватска ги победи Аргентина, Англија и Данска, а во финалето загуби од Франција со 4:2, освојувајќи го првото светско сребро во историјата.
Но, неговиот мандат не помина без контроверзии. Првата голема одлука беше отстранувањето на Никола Калиниќ од репрезентацијата за време на Мундијалот во Русија, поради одбивање да влезе во игра против Нигерија. Подоцна следуваше јавниот конфликт со Анте Ребиќ по Европското првенство 2021, како и случајот со Марко Ливаја во пресрет на завршницата на Лигата на нации.
И покрај критиките, резултатите останаа на негова страна. Во Катар 2022, Хрватска повторно стигна до медал, овојпат бронзен, откако во драматични натпревари ги елиминираше Јапонија и Бразил. Во 2023 година следуваше и сребро во Лигата на нации, уште еден историски успех.
Последниот период од неговото владеење донесе и падови. Хрватска разочара на Европското првенство 2024, каде што испадна во групната фаза, а на Светското првенство 2026 беше елиминирана од Португалија по поразот од 2:1.
Со заминувањето на Далиќ завршува една од најуспешните ери во историјата на хрватскиот спорт. Осум години, три медали, големи победи, но и бројни дилеми, тоа е наследството на тренерот кој ја однесе Хрватска до најголемите фудбалски височини.
