Вишиот суд во Белград за 18 јуни го закажа објавувањето на пресудата за Владимир и Миљана Кецмановиќ, родителите на Коста Кецмановиќ, момчето кое во мај 2023 година уби девет ученици и еден училишен чувар, а рани уште пет ученици и наставник по историја.
Главниот јавен обвинител на Вишото јавно обвинителство во Белград, Ненад Стефановиќ, во завршниот збор побара максимални законски казни. За Владимир Кецмановиќ е предложена единствена казна од 14 години и 11 месеци затвор, додека за Миљана Кецмановиќ е побарана казна од три години затвор.
Обвинителството тврди дека трагедијата не била резултат на еден изолиран пропуст, туку на долгорочен неуспех во родителскиот надзор, воспитувањето, контролата на однесувањето на детето и препознавањето на предупредувачки знаци.
Според обвинителот, родителите не ја препознале опасноста, не го ограничиле пристапот до оружје и не обезбедиле соодветен надзор над детето. Тој оцени дека токму тие пропусти довеле до катастрофални последици за жртвите, нивните семејства и целото општество.
Владимир Кецмановиќ е обвинет за тешко кривично дело против општата сигурност и за запуштање и злоупотреба на малолетно лице. За првото дело обвинителството бара 12 години затвор, а за второто три години, односно единствена казна од 14 години и 11 месеци. За Миљана Кецмановиќ се бара тригодишна казна за запуштање и злоупотреба на малолетно лице.
Одбраната на брачниот пар Кецмановиќ, пак, тврди дека наводите од обвинението не се докажани и побара ослободителна пресуда. Завршни зборови изнесоа и адвокатите на оштетените, семејствата на убиените, како и самите обвинети.
Случајот повторно се најде пред суд откако Апелациониот суд во Белград ја укина првата првостепена пресуда и наложи судењето да се повтори. Втората првостепена пресуда ќе биде објавена на 18 јуни, а и обвинителството и одбраната ќе имаат право на жалба.
Коста Кецмановиќ во времето на нападот немаше 14 години и затоа не може кривично да одговара. Масовното убиство во „Владислав Рибникар“ останува едно од најтешките злосторства што ја потресоа Србија и регионот.
