Грција го поедностави влезот на дел од егејските острови, со визен режим кој овозможува полесно патување и престој до седум дена без претходно извадена целосна шенген-виза.

Мерката беше воведена во 2024 година и веќе донесе зголемен број посетители, како и значителен економски бенефит за локалниот туризам на островите.

Полесен влез со виза по пристигнување

Поедноставениот систем за издавање визи по пристигнување важи за дел од грчките острови во Егејското Море.

Програмата првично важеше за десет острови, а подоцна беше проширена на дванаесет. Меѓу нив се Самос, Родос, Кос, Хиос, Лезбос, Патмос и Самотраки.

Со оваа виза може да се престојува до седум дена на островите, но таа не дозволува патување кон копнениот дел на Грција или во други земји од Шенген-зоната.

Решение за полесни патувања

За многу патници, ова претставува практично решение во период кога добивањето шенген-виза станува сè покомплицирано и трае подолго.

На островот Самос секојдневно пристигнуваат траекти од турските крајбрежни градови, а голем број ресторани и продавници веќе нудат услуги и информации на турски јазик.

Локалниот туризам со економски бенефит

Според податоците на Банката на Грција, во текот на 2025 година земјата ја посетиле речиси 1,5 милиони туристи од Турција, што е значителен пораст во споредба со претходната година.

Локалните туристички работници оценуваат дека зголемениот број посетители има важен придонес за економијата на островите.

Сепак, тие предупредуваат дека процедурите во пристаништата треба дополнително да се забрзаат, за да се избегнат долгите чекања и да се овозможи подобро искуство за патниците.