Лидерот на унгарската партија Тиса, Петер Маѓар, која победи на парламентарните избори, најави дека ограничените цени на бензинот и дизелот ќе останат во сила и по преземањето на власта. Тој истакна дека мерката ќе продолжи без дополнително оптоварување на државниот буџет.
Во објава на Фејсбук, Маѓар информираше дека договорот е постигнат по разговори со извршниот директор на нафтено-гасната компанија МОЛ група, Жолт Хернади, на состанок на кој присуствувале и претставници на партијата и раководството на компанијата.
„МОЛ потврди дека континуираното снабдување со гориво во Унгарија ќе биде загарантирано, дури и во услови на турбуленции на глобалниот пазар“, наведе Маѓар.
Со оваа одлука, новата влада сигнализира продолжување на политиката на контрола на цените на енергенсите, со цел да се намали притисокот врз граѓаните во услови на нестабилни глобални енергетски пазари.
