На Универзитет „Св. Кирил и Методиј“ денеска беше отворена нова лабораторија за органска хемија на Технолошко-металуршки факултет, инвестиција вредна 2 милиони денари, наменета за унапредување на наставата и научноистражувачката работа.
Лабораторијата е опремена со современа технологија и ќе овозможи подобри услови за едукација, практична работа и истражување во областа на органската хемија и сродните дисциплини. Средствата за нејзиното уредување се обезбедени со поддршка од Министерство за образование и наука, УКИМ и од сопствени ресурси на факултетот.
Деканот на факултетот, Игор Јорданов, посочи дека со новата лабораторија студентите ќе добијат можност да работат во современи услови, споредливи со оние во развиените академски центри. Освен за настава, лабораторијата ќе се користи и за научни проекти, како и за практична настава по хемија, биологија и физика за ученици.
Ректорката на УКИМ, Биљана Ангелова, оцени дека ова е важен чекор кон зајакнување на истражувачката инфраструктура и интегрирање на науката во наставниот процес.
Органската хемија, како што беше посочено на отворањето, има широка примена – од фармацевтската и прехранбената индустрија до развојот на нови материјали и енергетски решенија, што ја прави оваа инвестиција значајна и за академијата и за стопанството.
