Грчката полиција уапси 13 лица во нова акција против злоупотреба на европски земјоделски субвенции, во случај во кој осомничените, според истрагата, незаконски се стекнале со повеќе од 2,5 милиони евра.

Акцијата се спроведува во регионите на Кожани и Агринио, а ја води Одделот за борба против економски криминал при Дирекцијата за борба против организиран криминал. Истражителите се сомневаат дека групата користела лажни изјави и манипулации за да дојде до средства од европските земјоделски фондови.

Меѓу приведените има и управител и вработен во центар за прием на барања за субвенции, што дополнително го проширува сомнежот дека измамата била организирана преку системот за аплицирање. Истрагата, според грчките служби, опфаќа вкупно 39 лица.

Полицијата соопшти дека, покрај незаконски стекнатата финансиска корист, биле откриени и даночни прекршоци. Случајот се води како дел од пошироката борба против злоупотреби што ги оштетуваат финансиските интереси на Европската Унија.

Ова е втора голема акција во Грција во последните денови поврзана со европски земјоделски фондови. Минатата недела, во одделни операции во Солун, Килкис, Сер, Атина и на Крит беа уапсени 39 лица, осомничени дека незаконски присвоиле повеќе од 7 милиони евра од европски субвенции.